که طالبان له خپلو ژمنو تېر شي، هر څه ګډوډېدای شي – Hindukosh


هندوکش ــ کابل: د افغانستان جمهور رئیس اشرف غني طالبانو ته یو “جدي” پیغام ورکړ او هغه دا چې که دا ډله له خپلو ژمنو تېره شي، هر څه ګډوډېدای شي.
ښاغلي غني دا پیغام یکشنبه ماښام «۱۳۹۸ کال د کب ۱۱» له سي‌اېن‌اېن ټلوېزیون سره په یوه مرکه کې طالبانو ته ورکړ.
هغه زیاته کړه: “تړون مشروط دی. که چېرته طالبان په دې ۱۴ میاشتنۍ موده کې داسې تصور کوي چې له دغو موافقو ووځي هر څه سقوط کولای شي او مسؤلیت به‌یې هم د هغوی په غاړه وي.”
ښاغلي غني شنبه او یکشنبه هم په خپلو جلا جلا ویناوو کې له طالبانو سره شوی تړون مشروط وباله او ویې‌ویل هوکړه په دې مشروط ده چې طالبان‌یې مواد څرنګه عملي کوي.
د امریکا د بهرنیو چارو وزیر مایک پومپيو چې تازه له دوحې واشنګټن ته ستون شوی پرون یکشنبه‌یې د سي بي اېس ټلوېزیون له فېس دې نېشن پروګرام سره په مرکه کې وویل چې طالبانو ژمنه کړې چې له ترهګرو سره اړیکې پرې کوي، خو امریکا هر څه څاري او تش په خبرو باور نه‌شي کېدای.
هغه زیاته کړه: “دا معامله په هېڅ‌چا باندې په باور تړلې نه‌ده. دا یوه ژوره مجموعه ده، د څو میاشتو مذاکرو ښه ارزول شوې او تأیید شوې مجموعه او تګلاره ده چې له مخې یې موږ د تړون هر یو غړی څارلی او حساب کتاب ورسره کولای شو. موږ به دا کار وکړو. دا په باور کومه تړلې خبر نه‌ده. دا په هغه څه تړلي دي چې عملاً په میدان کې ترسره کېږي. نه‌یوازې پرون چې یوه مهمه ورځ وه، بلکې د راتلونکو ورځو په مخه هم.”
پومپيو وویل دا تړون دوه سِري پوځي تطبیقي اسناد هم لري چې د امریکا د ټولو ځمکنيو، هوايي او بحري قواو د خوندي ساتلو لپاره دي او د کانګرس غړي به چانس ولري چې ویې‌ګوري.
سپوږمۍ پوپلزۍ

Share this page to Telegram



Source link

Leave a Reply