دوشنبه , مارچ 25 2019
Home / افغانستان / د شمالي او جنوبي وزيرستان د مشرانو جرګه افغانستان ته تللې

د شمالي او جنوبي وزيرستان د مشرانو جرګه افغانستان ته تللې

د شمالي وزيرستان او جنوبي وزيرستان مشران، د سياسي ګوندونو استازي او لسګونه کسان نن [د مارچ ۱۶مه] د افغانستان د پکتیکا ولایت برمل ولسوالۍ ته د لویې جرګې په بڼه روان شوي دي. په جرګه کې د قامي اسمبلي غړی او د پښتون ژغورنې غورځنګ مخکښ علي وزير هم شامل دی.

د لویې جرګې مشر ډاکټر ګل عالم وزير ادعا وکړه چې د مارچ پر نهمه د برمل په رخه کې د پوځي عملياتو پر مهال د اوتمانزو قوم بېګناه وګړي وژل شوي او دوی د دې پېښې پر ضد د احتجاج او له اوتمانزو سره د همږغۍ لپاره راپورته شوي دي. نوموړي زياته کړه چې په جرګه کې د شمالي او جنوبي وزيرستان د هر قوم وګړي ورسره مل دي.

په دې جرګه کې ځېنې هغه کسان هم شامل دي چې په وينا يې د پوځي عملياتو پر مهال خپلوان وژل شوي دي.

له دې وړاندې د افغانستان سرحدونو او قبایلو چارو وزارت د مارچ پر ۱۲مه په يوه خبرپاڼه کې وويل چې د هغو اوازو په اړه څېړنه کوي چې د پکتیکا ولایت په برمل ولسوالۍ کې د یوه برید په اړه راپورته شوې او ويل شوي چې د ګډو ځواکونو په عملياتو کې وزيرستاني کډوال په نښه شوې دي.

بلخوا د افغانستان د پکتيکا ولايت امنيې قوماندان جنرال غلام سخي روغ ليوني د مارچ پر ۱۱مه له مشال راډيو سره په خبرو کې پر ټولنيزو مطبوعاتو ورکړل شوي هغه معلومات ناسم وبلل چې وايي، وژل شوي د وزيرستان کډوال وو. نوموړي ويلي و چې ۱۵ طالبان وژل شوي چې درې يې عربان دي او کوم ولسي وګړی پکې نشته.

طالبانو تر اوسه په دې اړه څه نه دې ويلي.

بشپړ خبر په اصلي منبع کې وګورئ

About tribalnews